prentvæn útgáfa
Kynning á forystumönnum Framsóknar og óháðra á Seltjarnarnesi
14/05/2010Hér er stutt kynning á Kristjönu Bergsdóttur og Kristjáni Þorvaldssyni, en þau skipa efstu sæti lista Framsóknar og óháðra á Seltjarnarnesi:
1. Kristjana Bergsdóttir
Kristjana er 57 ára gamall kerfisfræðingur frá H.R. sem starfar nú við hugbúnaðarvinnu hjá HuguAx hugbúnaðarhúsi. Hún er jafnframt menntaður framhaldsskólakennari með uppeldis- og sálarfræði sem megin greinar. Hún hefur búið á Nesinu í 18 ár í Hrólfsskálavörinni. Kristjana hefur talsverða reynslu af þátttöku í félagsstörfum og var bæjarfulltrúi á Seyðisfirði. Hún sat sem varaþingmaður á alþingi fyrir Austurland. Kristjana var einnig formaður Landsambands Framsóknarkvenna í nokkur ár og vann þá að og fékk samþykkta jafnréttisáætlun í Framsóknarflokknum sem síðan varð öðrum flokkum til fyrirmyndar. Kristjana hefur víðtæka starfsreynslu m.a. var hún fyrst kvenna á Íslandi til að keyra strætó og stundaði handfæraveiðar að sumarlagi. Áhugamálin eru mörg m.a. býflugnarækt og einnig skógrækt. Jafnframt er Kristjana maraþonhlaupari og hljóp m.a. fyrir mánuði síðan Boston maraþonið og er að æfa fyrir Laugavegshlaupið 2010. Kristjana er gift Atla Árnasyni lækni og eiga þau 3 börn.
2. Kristján Þorvaldsson
Kristján Þorvaldsson er 27 gamall og starfar sem verkefnisstjóri hugbúnaðarmála hjá Orkuveitu Reykjavíkur. Hann er stúdent af eðlisfræðideild I frá Menntaskólanum í Reykjavík og með B.Sc. gráðu í rafmagnsverkfræði frá Háskóla Íslands. Kristján er fæddur og uppalinn á Miðbrautinni á Nesinu og stundaði knattspyrnu og handknattleik á sínum yngri árum. Kristján stundaði kennslu samhliða námi í Valhúsaskóla og Menntaskólanum í Reykjavík ásamt því að vera stundakennari við Háskóla Íslands. Hann hefur setið í nokkrum starfsnefndum Seltjarnarness og á núverandi kjörtímabili í skólanefnd. Kristján var einnig formaður Bæjarmálfélags Seltjarnarness um tíma. Áhugamál Kristjáns er einkum boltaíþróttir og er hann með harðari stuðningsmönnum AC Milan á Íslandi. Hann hefur einnig áhuga á raunvísindum og ýmsu er tengist upplýsingatækni. Kristján er í sambúð með Helenu Sif Magnúsdóttur tölvunarfræðinema.
|